नेपाल-खनाल पक्षको स्थायी कमिटी बैठक आज पनि बस्दै

काठमाडौं । नेकपा एमालेको माधवकुमार नेपाल र झलनाथ खनाल पक्षको स्थायी कमिटी बैठक आज पनि बस्दैछ ।

संगठन सुदृढीकरण, प्रशिक्षण सञ्चालन लगायतका ‘राष्ट्रव्यापी अभियान’ घोषणा गर्ने तयारीका लागि आज स्थायी समितिको बैठक बस्न लागेको नेता योगेश भट्टराईले जानकारी दिनुभयो । नेता भट्टराईले दिउँसो तीन बजे बस्ने बैठकले देशव्यापी रुपमा संगठन सदृढीकरण तथा कार्यकर्ता प्रशिक्षण अभियान घोषणाको औपचारिक निर्णय गर्ने बताउनुभयो ।

उहाँले राष्ट्रव्यापी अभियान सञ्चालनबारे विभिन्न प्रस्ताव आएको जानकारी दिँदै त्यसबारे आजको बैठकबाट निर्णय गर्ने बताउनुभयो । खनाल–नेपाल समूहले यसअघि गत चैत्र ४ र ५ गते ललितपुरमा राष्ट्रिय कार्यकर्ता भेला गरेपछि समानान्तर कमिटि गठन गर्दै आइरहेको छ ।

खनाल नेपाल समूहले आज उदयपुरमा पनि समानान्तर कमिटी गठन गर्ने तयारी गरेको छ । खनाल–नेपाल समूहले नेताहरुमाथिको कारबाही पार्टीको नवौं महाधिवेशनले पारित गरेको विधान विपरीत, स्वेच्छाचारी र पूर्वाग्रही भएको निष्कर्ष निकालिसकेको छ ।

सर्वोच्च अदालतको २३ फागुनको फैसलाले पार्टीलाई पुरानै अवस्थामा फर्काए पनि पार्टी अध्यक्ष ओलीले त्यसको कार्यान्वयन नगरेको नेपाल–खनाल पक्षले आरोप लगाउँदै आएको छ ।