एजेन्सी । अमेरिकामा कोरोना संक्रमणबाट मृत्यु भएकाहरुका शोकमा पाँच दिनका लागि राष्ट्रिय झण्डा आधा झुकाइने भएको छ ।
कोरोना संक्रमणबाट मृत्यु हुनेको संख्या पाँच लाख नाघेसँगै राष्ट्रपति जो बाइडेनले शोक मन्तव्य व्यक्त गर्दै सबै संघीय संस्थालाई पाँच दिनका लागि राष्ट्रिय झण्डा आधा झुकाउन आह्वान गरेका हुन् । कोरोना महामारीका कारण अमेरिकामा धेरै व्यक्तिको मृत्यु भएको छ ।
अमेरिकाको पश्चिमी तटमा पहिलोपटक कोरोना भाइरस पाइएको एक वर्षभित्र पाँच लाख १२ हजार ५ सय ९० जनाको संक्रमणका कारण मृत्यु भएको हो । कोरोना सुरुमा चीनमा देखा परेको थियो । मृतकको संख्या पाँच लाख नाघेको कठोर क्षणलाई ह्वाइट हाउसमा मौनधारण र मैनबत्ती बालेर स्मरण गरिएको छ ।
यस्तै कोरोना संक्रमणको कारण विश्वभर २४ लाख ८५ हजार ८ सय ८८ जनाको मृत्यु भईसकेको छ । हालसम्म विश्वमा ११ करोड २२ लाख ८३ हजार ९ सय ७९ जना संक्रमित भएका छन् ।
आफ्नो प्रतिकृया दिनुहोस्