काठमाडौं ।
निर्वाचन आयोगले नेपाल कम्युनिष्ट पार्टी नेकपाका दुबै पक्षलाई छलफलका लागि बोलाएको छ । आयोगले नेकपाका अध्यक्षद्धय केपी शर्मा ओली र पुष्पकमल दाहाललाई छुट्टाछुट्टै पत्र लेखी निर्वाचन सम्बन्धी छलफलका लागि बोलाएको हो ।
आयोगले भोली विहान साढे ११ बजे दुबै अध्यक्ष र अध्यक्षले तोकेका ५÷५ जना आधिकारिक व्यक्तिलाई समेत छलफलका लागि बोलाएको आयोगका प्रवक्ता राजकुमार श्रेष्ठले जानकारी दिनुभयो । सरकारले आगामी वैशाख १७ र २७ गते निर्वाचनको मिति तोकेपछि आयोगले दल दर्ता प्रक्रिया चाँडै नै सुरु गर्ने बताएको छ ।
दल दर्ता गर्न सूचना प्रकाशन गर्ने समय आउन लागेकाले त्यस विषयमा छलफल गर्न लागिएको प्रवक्ता श्रेष्ठले बताउनुभयो । त्यस्तै निर्वाचनसम्बन्धी कानुनमाथि छलफल र निर्वाचनको तयारीका विषयमा पनि छलफल हुने उहाँको भनाइ छ ।
यसअघि नेकपाको दुईवटै पक्षले आफूलाई आधिकारिक दावी गर्दै आयोगमा दिएको निवेदनमा निर्णय गर्दै आयोगले दुबै पक्षको दावी नपुग्ने बताएको थियो ।
आफ्नो प्रतिकृया दिनुहोस्